Pas mbylljes doganës së Kapshticës, mijëra emigrantë shqiptarë që kaluan festat në vendin tonë po kalojnë përmes Maqedonisë së Veriut për të shkuar në Greqi.
Që nga ditët e para të këtij viti, është vërejtur një fluks i pazakontë daljeje në pikën e kalimit kufitar të Qafë-Thanës, ku pjesa më e madhe e personave janë emigrantë që shfrytëzojnë Maqedoninë e Veriut për të kaluar në Greqi.
Kryesisht, këtë rrugë tranziti po e përdorin emigrantë që i kanë patur të afërmit në zonën qendrore dhe juglindore të Shqipërisë dhe që vendbanimin rezident e kanë në pjesën verilindore të Greqisë.
Sipas të dhënave zyrtare të policisë kufitare të Qafë-Thanës, nga kjo pikë kalimi përgjatë 5 ditëve të para të vitit 2021 kanë dalë 6500 shtetas shqiptarë, shumica emigrantë në Greqi. / Opinion.al
