Kryeministri i Kosovës, Ramush Haradinaj ka informuar ambasadorët e vendeve të Kuint-it, si dhe shefen e zyrës së BE-së në Prishtinë, Nataliya Apostolova, lidhur me situatën në veri, pas mbylljes së dyqaneve nga ana e tregtarëve lokal, si kundërshtim ndaj taksës së vendosur ndaj mallrave serbe.
Përfaqësuesit e bizneseve të Mitrovicës së Veriut thonë se atyre u mungojnë furnizimet për shkak të taksës, ndërsa autoritetet e Serbisë kanë paralajmëruar “krizë humanitare”.
Qeveria e Kosovës i ka hedhur poshtë pretendimet se në atë pjesë të vendin ka krizë humanitare dhe të hënën është angazhuar të hapë pika të shitjes në veri.
Kryeministri, Ramush Haradinaj, përmes një postimi në Facebook tha se ambasadorët i ka informuar për “angazhimin e Qeverisë për sundim të ligjit dhe rendit në veri, si dhe për veprimet e ndërmarra për furnizim të qytetarëve të asaj ane me artikuj të nevojshëm”.
Në shtete e Kuintit, bëjnë pjesë Shtetet e Bashkuara të Amerikës, Britania e Madhe, Gjermania, Franca dhe Italia. Qeveria e Kosovës shpërndau kamionë me mallra në veri për të mbushur boshllëkun e krijuar nga protesta.
Para tarifave, Serbia eksportonte në Kosovë rreth 500 milionë euro në vit dhe autoritetet në Serbi janë ankuar për humbje të mëdha të kompanive serbe që nga nëntori i vitit të kaluar.
Beogradi akuzon Prishtinën se ka bllokuar procesin e bisedimeve për normalizimin e marrëdhënieve me tarifat duke kërkuar heqjen e menjëhershme të tyre, ndërsa Prishtina akuzon Beogradin për kushtëzim bisedimesh.
Qëndrimet e pandryshuara të palëve bënë që të dështojë edhe një nismë e kancelares gjermane Angela Merkel dhe presidentit francez Emanuel Macron, për një takim në Paris që ishte për planifikuar për sot më 1 korrik./ Opinion.al
