Pas më shumë se pesë orësh, protesta e opozitës është mbyllur në orën 16:00. Ishte Lulzim Basha, që me anë të një fjalimi të shkurtër, falenderoi pjesëmarrësit dhe i ftoi të ishin më të shumtë në numër të enjten e ardhshme, më 21 shkurt.
“Derën e kryeministrisë e bllokoi me dorën e tij. S’do të hyjë e s’do të dalë më prej saj. Populli do të marrë fatin në duart e tij. Ju ftoj të jemi edhe më shumë, edhe më të vendosur, edhe më të bashkuar, të enjten e javës së ardhshme. Liri, demokraci, Shqipëri si gjithë Europa”, tha Basha nga bulevardi “Dëshmorët e Kombit”.
Vendimi i Lulzim Bashës erdhi pas një bisede të shkurtër në shesh me Monika Kryemadhin, Sali Berishën dhe drejtues të tjerë të opozitës. Kujtojmë se dita e enjte është edhe ditë kur mblidhet parlamenti, ndaj mbetet për t’u parë nëse opozita do të mblidhet sërish përpara kryeministrisë apo do të zgjedhë parlamentin për të protestuar.
