Pas pikës kufitare të Kapshticës, është mbyllur edhe ajo e Kakavijës.
ABC News raporton se pala greke ka pezulluar punën pasi është plotësuar kuota prej 750 personash të cilët do të lejohen të kalojnë kufirin sipas rregullave të reja.
Më herët është pezulluar puna në pikën kufitare të Kapshticës pasi edhe atje u plotësua kuota prej 300 personash.
Mbyllja e pikës së Kakavijës vjen në një moment ku situata atje është e rënduar. Puna ka vijuar përgjatë mbrëmjes në këtë pikë por radhët vijojnë të mbeten të gjata, rreth 5 kilometra.
Që nga dita e mërkurë qytetarët që kërkojnë të ikin në Greqi nga pika kufitare e Kakavijës janë përballur me radhë të gjata. Kjo ka bërë që pjesa më e madhe e tyre të kalojnë netët në makinat e tyre. Ditën e djeshme një ngjarje tragjike u regjistrua në Kakavijë ku një fëmijë 10-vjeçar që po priste në radhë me familjen e tij u përplas nga ambulanca dhe humbi jetën.
Radhët në pikën doganore të Kakavijës janë shkaktuar për shkak të rregullave të vendosura nga pala greke e cila këkon që çdo qytetar që do të hyjë në Greqi të ketë kryer testin për Covid dhe të ketë rezultuar negativ./ Opinion.al
