Pentagoni deklaroi se do të rrisë prezencën amerikane në rajonin verilindor të Sirisë, për të parandaluar ndonjë kryengritje të re të ekstremistëve të grupit militant, Shteti Islamik (ISIS), me synim pushtimin e zonave të naftës.
“Një nga fitoret më të mëdha të SHBA-së dhe partnerëve tanë në luftën kundër ISIS-it ka qenë kontrollimi i zonave të naftës në Sirinë Lindore. Shtetet e Bashkuara janë të përkushtuara për të fuqizuar pozicionet në koordinim me partnerët tanë të FDS-së, në verilindje të Sirisë, që të parandalohet rënia e zonave të naftës në duart e ISIS-it apo aktorëve tjerë destabilizues”, thuhet në deklaratë.
Edhe sekretari amerikan i Mbrojtjes, Mark Esper ka thënë se qëllimi kryesor i prezencës amerikane është që ISIS-it t’i pamundësohet rikthimi i fuqisë në zonat e naftës.
Ky vendim vjen disa ditë pasi presidenti amerikan, Donald Trump njoftoi tërheqjen e trupave amerikane nga zona e kufirit Siri-Turqi, duke lejuar forcat turke të krijojnë të ashtuquajturën “zonë të sigurt”, që nënkupton edhe largimin e luftëtarëve kurdë nga ky territor.
Vendimi u kritikua nga demokratët dhe republikanët, të cilët kanë shprehur shqetësim që rreth 1,000 militantë të burgosur të ISIS, që mbahen nga Forcat Demokratike Siriane, (FDS) të drejtuara nga kurdët, mund të largohen gjatë trazirave.
Forcat turke dhe ato ruse tani janë duke patrulluar zonën afër kufirit që më parë ishte kontrolluar nga forcat amerikane dhe policia kurde./Opinion.al
