Ambasadori i Mbretërisë së Bashkuar në Organizatën për Siguri dhe Bashkëpunim në Evropë (OSBE), Neil Holland, ka shprehur shqetësim për mbylljen e ndërtesave dhe institucioneve në veri të Kosovës, që funksiononin sipas sistemit të Serbisë.
Sipas një njoftimi të publikuar në ueb-faqen e Qeverisë britanike lidhur me raportin e shefit të misionit të OSBE-së në Kosovë për gjashtë muajt e fundit, Holland po ashtu tha se është urgjente që Kosova të formojë Qeverinë e re, pas zgjedhjeve të shkurtit që tha se u mbajtën në mënyrë paqësore.
“Jemi veçmas të shqetësuar me natyrën e pakoordinuar të mbylljes së institucioneve dhe ndërtesave në veri të Kosovës që ofrojnë shërbime vitale për serbët e Kosovës dhe komunitetet e tjera joshumicë. Mbretëria e Bashkuar vazhdon të inkurajojë Qeverinë e Kosovës që të sigurohet që komunitetet joshumicë të mund të luajnë rol të barabartë në të ardhmen e shtetit dhe të respektojnë zotimet e Kosovës si një shtet gjithëpërfshirës dhe multietnik”, tha ai.
Kosova nisi mbylljen e institucioneve serbe në fillim të vitit 2024. Fillimisht u mbyllën organet e përkohshme komunale, banka Kursimorja e Postës, Posta e Serbisë, Fondi për sigurim pensional dhe shëndetësor, qendrat për punë sociale, ndërmarrjet publike dhe institucione të ngjashme.
Në valën e fundit të mbylljes së institucioneve që funksionojnë në sistemin e Serbisë janë përfshirë edhe salla sportive, biblioteka të qytetit, muzeu i qytetit në Mitrovicën e Veriut, Instituti për kulturë, rini, sport dhe shërbime të specializuara, si dhe Shoqëria Kulturo-Artistike “Kosovski Bozhur”.
Ambasadori Holland po ashtu foli edhe për dhunën në veriun e Kosovës, duke përmendur sulmet ndaj pjesëtarëve të KFOR-it më 29 maj 2023 në Zveçan dhe sulmin e armatosur nga një grup i serbëve kundër Policisë së Kosovës në Banjskë shtatorin e po atij viti.
“Ne vazhdojmë t’i bëjmë thirrje Serbisë që të bashkëpunojë plotësisht lidhur me përpjekjet që të gjithë përgjegjësit për sulmin ndaj pjesëtarëve të KFOR-it dhe në Banjskë të mbahen përgjegjës dhe të përmbushë zotimin për bashkëpunimin në hetimin për sulmin në kanalin e Ibër Lepencit”.
Për sulmin në Banjskë dhe në Ibër-Lepenc, Kosova ka fajësuar Serbinë, por Beogradi ka mohuar përgjegjësinë.
Ambasadori britanik po ashtu kërkoi që Kosova dhe Serbia të angazhohen në dialogun e ndërmjetësuar nga Bashkimi Evropian dhe të zbatojnë obligimet, përfshirë themelimin e Asociacionit të komunave me shumicë serbe.
Kosova dhe Serbia zhvillojnë dialog për normalizim që nga viti 2011. Palët kanë arritur një sërë marrëveshjesh, por BE-ja ka thënë se pak prej tyre janë zbatuar. Palët po ashtu nuk kanë zhvilluar dialog në nivel politik që nga shtatori i vitit 2023, pas sulmit në Banjskë./rel
