I përshëndetur nga roja e nderit dhe më pas i mirëpritur me një filxhan çaji tradicional. Mbretëresha Elizabeta II priti sot Presidentin e SHBA Joe Biden në Kështjellën Windsor, pas Samitit të G7.
Me një fustan me lule dhe kapelë rozë, sovrania 95-vjeçare, së bashku me Biden dhe gruan e tij Jill, ndoqën një paradë të rojeve të nderit, (veshur me uniforma të kuqe dhe me kapele të zeza me lëkurë ariu) mbajtur në oborrin e rezidencës ku mbretëresha qëndron që nga fillimi i pandemisë.
Nën një diell rrezatues, Elizabeta II dhe të ftuarit e saj dëgjuan himnet britanike dhe amerikane e më pas të tre hynë në kështjellë për të pirë çajin, përpara se Biden të nisej për në Bruksel, ku të hënën ai do të marrë pjesë në takimin e NATO-s.
Me përjashtim të Lyndon B. Johnson, gjatë mbretërimit të saj 69-vjeçar, Mbretëresha është takuar me të gjithë presidentët amerikanë./Opinion.al
