Sot në orën 12:00 është mbledhur Komisioni Qendror i Zgjedhjeve për dhënien e mandatit të deputetit kandidatëve të Lëvizjes Socialiste për Integrim. Me pesë vota pro dhe asnjë kundër, pasi dy anëtarët e opozitës nuk ishin në mbledhje, KQZ vendosi t’u japë mandatet katër kandidatëve të LSI-së që kanë dorëzuar formularët e vetëdeklarimit.
Kështu në qarkun e Tiranës, në vend të Endrit Braimllarit dhe Floida Kërpacit morën sot mandatin e deputetit Edmond Rrushi dhe Ylli Shehu. Në Elbasan, Edmond Haxhinasto u zëvendësua nga Enver Roshi, ndërsa në Dibër mandatin e Përparim Spahiut e mori Aurora Mara.
Në lidhje me Ylli Shehun, relacioni thoshte se ishte dënuar me gjobë, por nuk përben problem për marrjen e mandatit.
“Ylli Vesel Shehu është dënuar me 200 mijë lekë gjobë. Nga krahasimi i të dhënave, rezulton se të dhënat e dhëna nga kandidati në formularin e vetëdeklarimit janë të njëjta. Ylli Vesel Shehu ka qenë deputet i Kuvendit të Shqipërisë në legjislaturën e viteve 2013-2017, KQZ ka bërë verifikimet dhe Ylli Shehu nuk gjendet në kushtet e pavlefshmërisë së mandatit. KQZ vendosi t’i japë mandatin e deputetit të deputetit kandidatit të radhës në listën shumë emërore të Lëvizjes Socialiste për Integrim, Ylli Shehu.”
Në përfundim, Klement Zguri tha se kush dëshiron të ankimojë këto vendime, mund të apelojë në Kolegjin Zgjedhor pranë Gjykatës së Apelit Tiranë./Opinion.al
