Pas vendimit të Edi Ramës për t’i hequr fondin Akademisë së Shkencave në projekt-buxhetin e vitit 2018, mblidhet urgjentisht asambleja ku i pranishëm ishte edhe akademiku Artan Fuga, një nga zërat më kritik mbi mënyrën sesi duhet të funksionojë ky institucion.
Të gjithë një zëri, mbi 20 akademikë të pranishëm në mbledhjen me dyer të mbyllura, thanë se ekzistenca e Akademisë së Shkencave është në ditën e saj më të errët.
Artan Fuga: “Po qe se Akademia nuk është në pozicionin e duhur, atëherë Kryeministri t’u ndërpresë fondet edhe institucioneve të tjera, të cilat dhe ato do reformohen, por me të tjerët nuk e bën dhe ka deklaruar për Akademinë. Për mua është një gabim total”.
Apollon Baçe: “Merkeli ka thënë 1 në 5 prioritetet që të hyjë Shqipëria në BE, kërkohet 3.5% të jetë buxheti shkencor edhe kërkohet një mbështetje e kësaj pune”.
Pika në të cilën akademikët nuk bien në një mendje është reforma që do ta nxjerrë institucionin e kërkimit shkencor nga apatia.
Gudar Beqiraj: “Për mua është vërtetë një eksperiencë që ka qenë mjaft efektive e jo me institute”.
Artan Fuga: “Për mua akademia të ekzistojë si një forum i pavarur, i zgjedhur nga shkencëtarët e Shqipërisë, i cili të jetë partner i qeverisë për drejtimin shkencor, strategjitë shkencore të vendit, monitorimin e arritjeve shkencore të vendit. Në qoftë se hyn në rrugën e dominimit të instituteve, unë po ju them publikisht që unë që në atë çast do jap dorëheqjen si anëtar i Akademisë së Shkencave”.
Në përfundim të mbledhjes Asambleja e Akademisë së Shkencave pritet të marrë një vendim të unifikuar.
Tv Klan
