Mbledhja e kryesisë së Partisë Demokratike që po zhvillohet pasditen e sotme është shoqëruar me debate.
Mësohet se drejtuesit politikë të PD kanë debatuar me Sekretarin e Përgjithshëm, Gazment Bardhi.
Shkaku i debateve është hartimi i dokumentit të analizës së humbjes së zgjedhjeve.
Ka qenë drejtuesi politik i qarkut të Korçës, Edmond Spaho, ai që ka hedhur poshtë përfundimin se qarku që ai drejtoi në zgjedhjet e 25 prillit nuk ka dalë brenda pritshmërive duke theksuar se ka marrë rezultatin më të mirë.
Edmond Spaho: Aty në raport z.Bardhi thua që Korça nuk ka dalë brenda pritshmërive? Si e shpjegon? Unë kam bërë tjetër analizë. Kam marrë rezultatin më të mirë. Kam pasur objektiv 5 mandate kam fituar 5 mandate.
Gazment Bardhi: Metodologjia e analizës nuk është bërë nga unë, por është bërë sipas një plani të bërë nga konsulentet. Mbi bazen e asaj metodologjie është bërë analiza.
Edi Paloka: Ky dokument nuk është realist. Nuk pasqyron atë që drejtuesit politikë kanë shkruar në raportet e tyre. Duhet ndryshuar dokumenti, nuk mund ta miratojmë në këtë mënyrë si është hartuar./Opinion.al
