Kreu i Partisë Demokratike Lulzim Basha, thirri në një mbledhje në selinë blu krerët e partive aleate.
Takimi zgjati rreth 1 orë dhe përfundim Monika Kryemadhi tha në një prononcim të shkurtër për mediat se qëndrimi i opozitës në lidhje me ftesën e kryeministrit Rama për tu ulur në tryezë për reformën zgjedhore mbetet ai i shprehur nga Lulzim Basha.
Më tej ajo shtoi se platforma e opozitës për nxjerrjen e vendit nga kriza është duke u shqyrtuar nga disa grupe pune.
“Janë duke punuar grupet e punës për këtë. Janë të gjithë personalitetet dhe njerëzit me integrit që po punojnë për platformën” tha Kryemadhi duke lënë të kuptohet se qëllimi i takimit të krerëve të partive opozitare ka qenë platforma që ata kanë paralajmëruar se do të paraqesin.
Në takim me Bashën kanë qenë kryetarja e LSI Monika Kryemadhi, kreu i PDK Nard Ndoka, kreu i PDIU Shpëtim Idrizi, Kreu i PR Fatmir Mediu, kreu i PAA Agron Duka dhe kreu i LZHK Dashamir Shehi.
Më herët gjatë ditës Lulzim Basha e konsideroi provokim ftesën e kryeministrit Rama për pjesëmarrjen në Komisionin e Reformës Zgjedhore. Ai shtoi gjithashtu se para se ti përgjigjet ftesës së zyrës së OSBE-së në Tiranë, pret një reagim nga ata në lidhje me raportin për zgjedhjet e 30 qershorit. /Opinion.al
