Ministri i Brendshëm, Sandër Lleshaj në një konferencë të mbajtur përpara drejtuesve të policisë në vend ka paralajmëruar se ata janë përgjegjës për çdo bimë kanabis të kapur në territorin e Shqipërisë pas datës 15 qershor.
Ministri bëri thirrje se në disa qarqe elementë të caktuar kriminal po përpiqen të shfrytëzojnë sa më shumë situatën për të ringjallur këtë fenomen, të cilin ai tashmë e cilësoi si të luftuar me sukses të paktën këto dy vitet e fundit.
“Ka të paktën 2 vite që ka një sukses të madh në heqjen e Shqipërisë nga harta e vendeve kultivuese të kanabisit. Kërkohen përpjekje të mëtejshme për ta luftuar që në embrion kultivimin. Me gjithë sukseset e mëdha potenciali për zhvillim i këtij aktiviteti ekziston ende”, tha ndër të tjera Ministri i Brendshëm.
Lleshaj bëri gjithashtu thirrje për të gjithë drejtuesit lokalë për vigjilencë në kontrollin e territorit, sidomos në këtë fazë të rëndësishme ku ndodhet Shqipëria, siç është pritja për hapjen e negociatave me Bashkimin Europian.
Një tjetër pikë e rëndësishme ishte lufta kundër krimit, ku ministri theksoi se puna do të matet me uljen e numrit të personave që janë në kërkim. “Lufta kundër krimit të organizuar, kërkohet angazhimi i të gjitha strukturave për të thelluar punën që vendi të plotësojë të gjitha parametrat e sigurisë, që janë detyrim i joni. Janë edhe detyrim edh enë kuadër të integrimit europian. Në fushën e krimit të organizuar janë prioritete të rëndësishme, kapja e personave në kërkim, trashëgojmë një listë të gjatë të personave që i janë shmnagur drejtësisë, janë qindra persona në harkun e 2-3 dekadave. Lista e kalon rendin e treshifrorëve, prioritet i madh është ulja e kësaj liste, që ju e keni në dorë me emra konkretë, që kërkohet të ulet me ritëm të lartë. Puna juaj matet me emra konkretë sa zbret kjo listë“./ Opinion.al
