TIRANË- Pas protestës së banorëve të Kombinatit që u kishin shkuar të fryra faturat e ujit, ka reaguar UKT. Ajo pranon gabimin por fajin e lë diku gjetkë të papërcaktuar.
UKT thotë në një njoftim për mediat se në Kombinat dhe në rrugën e Kavajës ka pasur mbifaturime, të cilat janë evidentuar pas printimit të faturave të ujit për muajin janar.
“Nga verifikimet e bëra rezulton se janë prekur gjithsej 1020 klientë me mbifaturime nga 202 mijë klientë në total. Në vlerë bëhet fjalë për 4 milionë lekë të reja që është faturuar më shumë”, thotë UKT-ja.
Sipas kësaj ndërmarrje ka dyshime se është ndërhyrë nga persona të jashtëm që kanë manipuluar shifrat. “Është një akt i qëllimshëm sabotimi, i kryer për të nxirë imazhin e ndërmarrjes që po përpiqet të reformohet, duke përmirësuar shërbimin dhe cilësinë”, bën të ditur UKT-ja.
Por edhe nëse është kështu, UKT-ja duhet të denoncojë në polici dhe prokurori këtë rast. E dyta UKT-ja duhet të ishte vetëdeklaruar në publik për mbifaturimet. Kujtojmë se reagimi vjen vetëm pasi banorët u hodhën në protesta.
