51 persona kanë humbur jetën si pasojë e zjarreve që janë përhapur në një zonë të banuar në Kilin qendror. Për shkak të përkeqësimit të situatës, Presidenti i Kilit, Gabriel Boric shpalli gjendjen e jashtbzakonshme.
Zyrtarët kilianë deklaruan se së paku 1.100 shtëpi janë shkatërruar nga zjarret. Duke folur për televizionin publik, presidenti kilian paralajmëroi se numri i të vdekurve mund të rritet, për shkak të përhapjes së katër zjarreve në rajonin Valparaiso, ku zjarrfikësit po kanë vështirësi të arrijnë në lagjet më të rrezikuara.
3 strehimore, 19 helikopterë dhe më shumë se 450 zjarrfikës u angazhuan për të ndihmuar në shuarjen e zjarrit në Valparaisos.
Fenomeni natyror i klimës, El Ninjo, ka shkaktuar thatësira dhe temperatura më të nxehta se zakonisht përgjatë pjesës perëndimore të Amerikës Jugore këtë vit, duke e rritur rrezikun për zjarre pyjore.
