Lindita Taipi punon prej më shumë se 3 dekadash në qendrën shëndetësore në Fushë-Kuqe (rrethi Kurbin). Mjekja është përzgjedhur si një nga personazhet e këtij viti dhe jo më kot, pasi ajo ka një karrierë të gjatë, frymëzuese dhe padyshim me sakrifica. Sonte në studion e “Opinion”, ajo kujtoi edhe periudhën kur ka punuar në Kukës.
“E mbaj mend periudhën e epidemisë së fruthit, pas derës kishte edhe 60,70 vizita në ditë. Raste të rënda, më shumë fëmijët që ishin me pneumoni të rënda. Në ato vite, kushtet s’kanë qenë të mira. Një dhomë kishim, aty bënim vizitat. Shkonim edhe me personelin e mjekësisë edhe nëpër shtëpi. Kam punuar edhe në spitalin e Kukësit, kam qenë mjeke roje te pediatria.”
Pas 4 vitesh në Kukës u zhvendos në Fushë-Kuqe, atje ku vazhdon edhe sot misionin e saj.
“Të shkosh në Adriatik në këmbë bashkë me infermieren, s’është e thjeshtë…E mbaj mend njëherë që na janë turrur të gjithë ata qenë…”, rrëfen Lindita.
Por pavarësisht ditëve të vështira, ajo thotë se njerëzit e zonës janë tejet paqedashës dhe të respektueshëm. “S’kam bërë asnjëherë të vetme debate me njerëz.”
Më e bukura? Lindita tregoi se në Mars 2025 del në pension, por do kërkojë ta ushtrojë detyrën e saj në vijim pasi nuk ka mjekë. “Më pëlqen zanati im! Që kur isha fëmijë ishte ai filmi “Plagë të vjetra”, i thashë babit do shkoj vetëm mjeke, kam mbaruar me të gjitha 10-ta”, tha ajo.
