SPAK dyshon për një tjetër episod korrupsioni për Ilir Metën dhe Monika Kryemadhin. Siç mëson gazetari i “Klan News” Besar Bajraktaraj, bëhet fjalë për mbi 240 mijë dollarë shpenzime me kartën e dytë bankare që ishte vënë në dispozicion nga biznesmeni shqiptaro-amerikan Adrian Shatku. Në hetimet e mëparshme ishte zbuluar një kartë tjetër “American Express” që gjithashtu përdorej dhe mbahej nga i njëjti biznesmen.
Kjo është shuma që është arritur të dokumentohet deri më tani pasi dyshohet se vlera mund të jetë më e lartë dhe për këtë priten të tjera letërporosi.
SPAK ka administruar disa letërporosi nga disa shtete të huaja mbi pagesat që janë kryer me këtë kartë të dytë online bankare.
Meta ka mohuar të ketë lidhje me këtë kartë bankare duke u distancuar nga veprimet e ish-bashkëshortes. Ai ka theksuar se po mbahet në qeli me urdhër politik dhe se po krijohen “episode” përmes manipulimit.
“Unë e mirëkuptoj pasionin e tyre për të mbajtur me pahir në opinion një çift, që nuk ekziston më as juridikisht prej një viti“, është shprehur Meta nga burgu, ku qëndron prej 21 tetorit të vitit të shkuar.
Teksa hetimet do vijojnë edhe për tre muaj të tjerë, Meta dhe Kryemadhi janë marrë të pandehur nga SPAK për korrupsion, pastrim parash dhe mosdeklarim pasurie. /tvklan.al
