Mark Lushi prej 42 vitesh punon si shofer. Ndonëse ka dalë në pension, ai ka vendosur të qëndrojë në krye të detyrës.
Mark Lushi: Kam dy vjet që kam dalë në pension, na bën nevoja të punojme se pensioni është i vogël. Familja nuk e pret mirë se më thonë rri te shtëpia, por unë mora guximin duke qenë i shëndetshëm, do arrij të punoj deri ne 70 vjeç.
Sipas të dhënave zyrtare, gati 2% e pensionistëve janë në marrëdhënie pune, shumica prej tyra janë burra.
“Rreth 17 500 pensionistë rezultojnë të punësuar aktualisht në Shqipëri. Sipas të dhënave të drejtorisë së përgjithshme të tatimeve vit pas viti vihet re një trend në rënie. Por ekspertët e punësimit flasin për të kundërtën pasi sipas tyre një pjesë e pensionistëve zgjedhin të punojnë në informalitet për të shmangur kontributet në shtet”, raporton gazetarja Dorina Halili.
Gertjana Hasalla, eksperte punësimi:Vendosin të punojnë në të zezë sepse në mënyrë apo një tjeter ndikon në të ardhurat që do çojnë në fund të ditës në shtëpi.
Përveç nevojës ekonomike apo dëshirës për të punuar edhe përgjatë moshës së pensionit, mungesa e fuqisë punëtore sipas ekspertëve shpesh bën që zgjidhja të gjendet edhe tek ta.
Gertjana Hasalla, eksperte punësimi: Ka profesione pafund për të cilat ka nevojë. Kërkesa e madhe për punëtorë sidomos të kualifikuar bën që shumë pensionistë të gjejnë më lehtë punë seç kanë gjetur më përpara.
Sipas të dhënave zyrtare, shumica e pensionistëve në Shqipëri punojnë si administrator, shitës në dyqan, roje apo shofer./ Tv Klan
