Pak ditë më parë Shqipëria u trondit nga një tjetër atentat mafioz, ku objektiv ishte 28-vjeçari Marklen Haka.
Në ngjarjen e ndodhur në Nikël të Fushë Krujës mbeti e vdekur halla e të riut, Shpresa Basha, e cila ndërroi jetë në spital.
Ndërkohë, mësohet se në vendngjarje u sekuestruan më shumë se 100 gëzhoja të qëlluara nga katër armë të ndryshme automatike.
Por dhe pse në drejtim të tij u qëlluan mbi 100 plumba, 28-vjeçari arriti t’u mbijetonte plagëve të marra duke marrë vetëm një plumb në krah.
Sipas autoriteteve shkaku i këtij atentati dyshohet se është hakmarrja, pasi Marklen Haka ka qenë i përfshirë më herët në ngjarje të tjera kriminale.
Atentatorët kishim mundur të hynin në thellësi të fshatit Zezë të Fushë-Krujës, aty ku jetojnë anëtarët e familjes Haka në fshehtësi të plotë dhe të padiktuar nga askush.
Sipas grupit hetimor rruga e cila të çon në banesën e fisit Haka është e monitoruar 24 orë nga kamerat e sigurisë, gjë e cila do të ndihmojë në procesin e hetimeve.
Nga hetimet rezulton se viktima 50-vjeçe, u qëllua aksidentalisht. Shpresa Basha ka hapur derën e jashtme të shtëpisë, në momentin kur u qëllua me armë zjarri.
Gjatë kohës që kanë nisur të shtënat me armë, objektivi i atentatit, Marklen Haka, ndodhej në oborrin e banesës. Deri më tani ende nuk është e qartë se si autorët arritën të qëllonin mbi 100 plumba dhe të largoheshin nga vendi i ngjarjes pa u ndaluar nga policia.
Dyshohet se personat e përfshirë në këtë ngjarje e njohin shumë mirë terrenin pasi, nuk janë larguar nga rruga kryesore automobilistike që lidh Niklën me Krujën. Ata kanë ndjekur rrugët dytësore të fshatit Zezë, duke humbur edhe gjurmët.
Ndryshe siç ndodh zakonisht në atentate të tilla mafioze, autorët nuk e kanë shkrumbuar automjetin dhe armët e krimit dhe kjo gjë sipas ekspertëve të policisë dyshohet se ka ndodhur për të mos tërhequr vëmendjen e banorëve të zonës.
Kujtojmë se Marklen Haka, i cili mbeti i plagosur gjatë atentatit, ka qenë i arrestuar për vrasje e cila ka ndodhur në viti 2011 në zonën e ish-Bllokut në Tiranë. Por, për shkak të mungesave të provave ai u la i lirë, duke i shpëtuar burgut.
Përfshirja e Marklen Hakas në ngjarje kriminale lidhet me vrasjen e vëllait të tij vitin 2004, gjë e cila ka bërë që në zonën e Fushë-Krujës të ndodhin seri ngjarjesh kriminale./ Opinion.al E.Xh.
