Shkodra është qyteti më i prekur nga koronavirusi në 24 orët e fundit.
Në njoftimin për mediat, zv/ministrja Mira Rakacolli tha se numri i rasteve ka arritur në 22, ku 12 janë konfimuar gjatë 1 dite. Mes të prekurve ajo tha është edhe një 13-vjecar.
“Sic shihet, nga rastet e reja të 24 orëve të fundit, Shkodra ka numrin më të lartë me 12 raste. Këto raste janë identifikuar në dy rrethe familjare, mes tyre është dhe një fëmijë 13-vjeçar, që janë identifikuar falë gjurmimit të rasteve të kryera nga epidemiologët ne terren”, tha Rakacolli.
Rasti i Shkodrës sipas saj duhet të shërbejë si thirrje për zbatimin e masave të distancimit social. Ajo apeloi edhe njëherë që distancimi të respektohet edhe brenda familjeve dhe të shmangen vizitat tek të afërmit.
“Kjo rritje e numrit të rasteve në Shkodër tregon edhe njëherë mos respektimin e distancimit social dhe masave të kontrollit të infeksionit që Ministria e Shëndetësisë vijon të rekomandojë çdo ditë ne komunikimet publike. Aktualisht po kryhet hetimi epidemiologjik në terren edhe me një ekip të Institutit të Shëndetit Publik. Ministria e Shëndetësisë dhe Mbrojtjes Sociale i kërkon qytetarëve të vijojnë të respektojnë masat e distancimit social. Është po kaq e rëndësishme që masat e kontrollit të infeksionit të respektohen maksimalisht edhe brenda rretheve familjare duke shmangur vizitat tek të afërmit për çdo lloj arsye për të parandaluar transmetimin e COVID-19”, deklaroi zv/Ministrja. /Opinion.al
