Ka dyshime se mbetjet spitalore nuk asgjësohen por hidhen në landfille duke rrezikuar shëndetin e qytetarëve. Prokuroria e Tiranës ka nisur hetimin për 6 kompanitë private, të licensuara për asgjësimin e mbetjeve spitalore, për dyshimet se disa prej tyre shkelin ligjin, raporton TCH.
Kompanitë kanë fituar tenderat për të grumbulluar mbetjet spitalore, nga spitalet publike dhe qendrat shëndetësore, dhe sipas ligjit ato paguhen, që këto mbetje t’i asgjësojnë me anë të djegies në temperatura shumë të larta, e më pas bëhet depozitimi në landfille me procesverbale të posaçme.
Prokuroria ka dyshime se anashkalohet ky proces nga disa nga kompani të licensuara. Ndërkohë që njëra prej tyre ka bërë edhe denoncim pranë prokurorisë e cila ka nisur hetimin bazuar në nenin 281 të Kodit Penal që flet për shkeljen e rregullave me lëndët helmuese dhe që parashikon dënimin nga gjobë deri në dy vjet burgim. Ky është parashikimi më i lehtë ligjor pasi nëse vërtetohet të ketë ndodhur diçka e tillë, për shkak se mbetjet spitalore konsiderohen të rrezikshme dhe kjo vepër dënohet me 10 vite burg. Sipas TCH, hetimi nisi në muajin nëntor të vitit 2017 dhe drejtohet nga prokurori Julian Zonja.
Kjo nuk është hera e parë që ngrihet problemi i mbetjeve spitalore që hidhen në ambiente të hapura. Flagrant ka qene investigimi i emisionit “Stop” në korrik 2017, kur gazetari i këtij emisioni u rrah nga pronarja e një kompania për riciklimin e mbetjeve spitalore. Kamera e “Stop” solli pamjet e hedhjes së mbetjeve të rrezikshme spitalore në bregun e lumit Erzen, në fshatin Picallë të Tiranës. Sakaq Mirela Topulli ushtroi dhune ndaj gazetarit Genci Angjellari, i cili po ndiqte çështjen në fjalë.
