4 ditë më parë, Ismet Çekorja, i cili mbeti i vrarë ditën e sotme nga të shtënat me armë në lagjen “Gureeile” në Shkodër, dha një intervistë për mediat ku deklaroi se djali i tij nuk ka lidhje me atentatin ndaj Alban Bruçit.
Çekorja ka thënë se të gjitha akuzat ndaj të birit, Bajram Çekorja, janë inskenime, ndërsa shton se ne momentin kur ndodhi ngjarja, djali i tij ka qenë në një vend të monitoruar me kamera.
“Policia ka ardhur në banesën tonë pas vrasjes së Arjan Ferracakut një kohë që viktima ishte nipi im po ashtu kur u vra edhe Fatos Ferracaku prapë më kanë thirrur mua dhe djalin. Pastaj janë vrarë vëllezërit Bilali dhe sërish policia në banesën time njëkohë që kemi kaq shumë vite që jemi fqinj. U plagos Admir Bajri, prapë në banesën time dhe familja jonë e ka patur një lloj njohje me familjen e tyre. Po ashtu u qëllua shefi i policisë bashkiake të Malësisë së Madhe sërish në banesën time kur në fakt autorët dolën krejt persona të tjerë. Rasti i fundit është me Alban Bruçin, djalin e Lad Bruçit të cilin unë e kam shumë mik dhe nuk ka asnjë shans që djali im të qëllojë djalin e tij kur ne kemi shumë miqësi aq më tepër që Bajrami, djali im është i monitoruar me kamera.
Këto sulme ndaj familjes tonë i bëjnë disa banditë, hajdutë biçikletash dhe banditë të veshur me pushtet. Se cila është arsyeja ne nuk e dimë. Ajo që kërkojmë është drejtësia. Djali im është i pafajshëm dhe nuk ka marrë pjesë në asnjë prej ngjarjeve kriminale për të cilat është i dyshuar. Janë të gjithë inskenime dhe tani ai duhet të qëndrojë rrugash dhe nuk mundet as të punojë as asgjë. Kërkojmë drejtësi dhe të zbardhen ngjarjet”, është shprehur Ismet Çekorja.
Kujtojmë se i riu, Alban Bruçi mbrëmjen e 25 gushtit në Shkodër u qëllua me 19 plumba më por arriti që të shpëtojë pa u plagosur. Ishte vetë 25-vjeçari që shkoi në polici dhe bëri një kallëzim për këtë atentat për të cilin policia ka shpallur në kërkim shtetasin Bajram Çekorja dhe një person tjetër./Opinion.al
