Një nga katër personat e mbetur të plagosur ditën e djeshme në Elbasan, ku mbeti i vrarë, Pjerrin Xhuvani, do të merret sot në pyetje nga policia.
Bëhet fjalë për 50-vjeçarin, Pavlo Vuksani, i cili tashmë ka dalë nga spitali pasi gjendja e tij është jashtë rrezikut për jetën dhe është shoqëruar në Policinë e Elbasanit, ku do të japë dëshminë e tij.
Sikurse shfaqet në video ish-oficeri i Policisë së Shkodrës, 50-vjeçari Pavlo Vuksani ka mbërritur në polici i shoqëruar me forca të shumta policore, nën masa të rrepta sigurie.
Vuksani u plagos me një plumb në qafë, por nuk pati rrezik për jetën. Ai është një ndër personat e aktivizuar në strukturat për mbrojtjen e votës në shtabin e PD.
Mesditën e djeshme rreth orës 14:00 në lagjen “5 Maji” përpara zyrës elektorale të PD-së në Elbasan ndodhi përplasja me armë me prapavijë politike. Në konflikt ishin të përfshirë dy grupe, të PS dhe PD. Nga grupi i PS-së, si pasojë e shkëmbimit të zjarrit humbi jetën Pjerin Xhuvani dhe u plagos dhëndri i tij Eltjon Bodinaku.
Ndërkohë që nga grupi i PD-së u plagosën Emiljan Prenga 39 vjeç dhe Pavlo Vuksani 50 vjeç. Autori i vrasjes së Xhuvanit sipas policisë është Arbër Papleka, gjithashtu pjesë e PD-së në Elbasan. Konflikti mes palëve nisi pas denoncimit të grupit të PD-së se në zonën e “5 Majit” po lëvizte një makinë pa targa ku socialistët po shpërndanin lekë për zgjedhjet e 25 prillit./Opinion.al
