Gjykata Penale e Tiranës caktoi masën e sigurisë “arrest në burg” për Gjergj Cukalin, i dyshuar si autor i vrasjes së ish-policit, Arben Bilali.
Mbi Cukalin i njohur ndryshe si “i forti i Myslym Shyrit” rëndojnë akuzat “Vrasje me paramendim e kryer në bashkëpunim” dhe “Prodhim dhe mbajtje pa leje te armeve luftarake”.
Në gjurmët e 40-vjeçarit policia ra pas gjetjes së automjetit tip Mercedes-Benc CLS, që u përdor për ekzekutimin e ish-efektivit Arben Bilali, mesditën e 30 janarit.
Në mjet janë gjetur gjurmë dhe prova, të cilat kanë çuar hetuesit tek autori i dyshuar i vrasjes, Gjergj Cukali. Dyshimet për hetuesit janë shtuar edhe më tej, pas përftimit të profilit të ADN-së, së Cukalit nga Loboratori i Policisë së Shkencore.
“I forti i Myslym Shyrit” është person i njohur për policinë, pasi ka precedent të mëparshëm penal, duke filluar nga akuzat për pengmarrje, armëmbajtje pa leje dhe shpërndarje droge.
Për herë të fundit ai u arrestua në 12 Prill 2018, pasi kishte shkelur masën e sigurisë, “arrest shtëpie”. Ndërsa në Korrik të vitit 2016 ai u arrestua së bashku me 16 persona të tjerë si pjesë e një rrjeti kriminal që shpërndante kokainë në Tiranë. Ky grup drejtohej pikërisht nga Cukali, dhe sipas policisë, fitimet e tyre shkonin në 50 mijë Euro në muaj./Opinion.al
