17% e pozicioneve të punës pjesë e shërbimit civil në vitin 2023 kanë mbetur të paplotësuara. Këtë evidenton raporti vjetor i komisionerit për mbikëqyrjen e shërbimit civil sipas së cilit nga 15 230 pozicione pune të raportuara nga institucionet e administratës publike, rezulton se 2 613 prej tyre janë vende të lira pune.
“Nga të cilat 10.4% në administratën shtetërore, 5.9% në njësitë e qeverisjes vendore dhe 0.8% në institucionet e pavarura.”
Shkaqet e numrit të lartë të vendeve të punës si nëpunës civil të mbetura bosh janë dorëheqjet dhe pezullimet nga shërbimi civil për një kohëzgjatje më shumë se 3 muaj, largimi nga puna për shkak të masave disiplinore apo dhe zhvillimi i fushatës elektorale për zgjedhjet vendore.
Ndër arsyet e tjera që përmenden në raport janë edhe migrimi i popullsisë si dhe mungesa e interesit për pozicione pune në vende të caktuara, jashtë qyteteve apo në bashki të nivelit të dytë dhe të tretë për shkak të pagave të ulëta apo largësisë me qendrën e banimit.
Për këtë vit, në 500 pozicionet e shpallura në departamentin e administratës publike Ministria e Financave dhe ajo e Ekonomisë së bashku me institucionet në varësi rezulton se kanë nevojat më të mëdha për punonjës.
Tv Klan
