Policë italianë do të monitorojnë kufirin tokësor shqiptar pas alarmit se rruga e emigrantëve tani do të jetë nga Shqipëria në Itali dhe më tej drejt shteteve të tjera europiane.
Që nga java e ardhshme do të zbarkojnë në Shqipëri forca të policisë italiane bashkë me mjete moderne për kontrollin e kufirit.
Ndërsa një pjesë e italianëve do të jenë në monitorimin e kufirit të gjelbër, të tjerë do të asistojnë në pikat e kalimit kufitar.
Për këtë ministri i Brendshëm, Saimir Tahiri ka udhëtuar në Itali ku takuar homologun Angelino Alfano.
Sipas tyre, kjo bëhet për të parandaluar terrorizmin, pasi bashkë me emigrantët mund të hyjnë fshehurazi edhe eksponentë të organizatave terroriste.
Mësohet se asistencën e ka kërkuar Ministria jonë e Brendshme, e cila do që italianët, të cilët kanë një përvoje më të mirë në këtë fushë, të jenë për një kohë të pacaktuar prezent në kufijtë tokësorë shqiptarë.
Përsa i perket kufirit detar, ato kanë të bëjnë me një shkëmbim informacioni më të intensifikuar në ditët në vazhdim, ndërsa patrullimet e përbashkëta ka kohë që funksionojnë mes palëve.
