Ka mbërritur këtë të enjte në Tiranë trupi i pajetë i nëntetares Zarife Hasanaj, e mbetur e vrarë të hënën në bazën e NATO-s në Letoni, pas shpërthimit të municioneve luftarake.
Arkivoli me trupin e Hasanajt u përcoll me një ceremoni ushtarake, ndërsa të pranishëm në aeroportin “Nënë Tereza” ishin edhe familjarë të saj, kolegë dhe përfaqësues shtetërorë.
Gjatë incidentit të së hënës, mbetën të plagosur edhe dy efektivë të tjerë, Major Klodian Tanushi dhe Rreshter Julian Kapaj, të cilët janë nën kujdesin e mjekëve në bazën e NATO-s në Letoni.
Ndërkohë, ministrja e Mbrojtjes Olta Xhaçka më herët gjatë ditës ka vizituar familjen e nëntetares.
Në një njoftim të shkurtër për mediat nga zyra për shtyp e Ministrisë thuhet se gjatë vizitës së saj, Xhaçka i shprehu ngushëllimet familjes së 32-vjeçares.“Dhimbja juaj është edhe e jona. Jeni pjesë e familjes së madhe ushtarake. Do të keni mbështetjen tonë për çdo nevojë. Ndarja nga jeta e Zarifes është humbje e madhe për të gjithë ne”, u shpreh ndër të tjera Ministrja.
Ministria njoftoi gjithashtu shpalljen “Dëshmor i atdheut” të efektives./Opinion.al
