Në Shqipëri kanë mbërritur mbrëmjen e sotme 9360 doza të tjera të vaksinës Pfizer, të cilat do të përdoren kundër COVID-19. Dozat e vaksinës janë pritur në aeroportin “Nënë Tereza” nga ministrja e Shëndetësisë, Oherta Manastirliu dhe ministri i rindëetimit, Arben Ahmetaj.
Manastirliu tha se fushata e vaksinimit do vijojë me të moshuarit plus 80 vjeç dhe më pas fasha e moshave që do të marrin vaksinën do të ulet gradualisht.
Ajo tha se procesi i vaksinimit do të vijojë të përshpejtohet deri në vaksinimin e plotë të qytetarëve. Ministrja siguroi se në ditët ne vijim në vendin tonë do të mbërrijnë doza të tjera të vaksinave.
“Do vijojmë me rivaksinimin, dhënien e dozave të dyta te bluzat e bardha, te të moshuarit. Që prej prillit do kemi lëvrimin e kontratës dhe do vijojmë me vaksinimin e kësaj kategorie +80 vjeç ndërkohë që presim edhe vaksinat e tjera”, tha Manastirliu.
Ndërkohë, teksa shumë vende të BE e kanë pezulluar, 38,400 dozat e vaksinës AstraZeneca janë shpërndarë në të gjithë vendin dhe ka filluar procesi i vaksinimit të mësuesve në Lezhë, në Krujë, në Lushnje, në Divjakë, etj.
Shqipëria ka nisur vaksinimin anti-COVID prej fillimit të muajit janar, por shifrat e viktimave dhe rasteve me COVID-19 vijojnë të mbeten të larta. Në 24 orët e fundit kanë humbur jetën 15 persona nga COVID-19, ndërsa janë regjistruar 543 raste të reja nga 3001 teste të kryera./ Opinion.al
