Qeni më i vjetër në botë ka ngordhur në moshën 31 vjeç e 165 ditë, shkruan BBC.
Mbajtësi i rekordeve Guinness Bobi, një race e pastër Rafeiro do Alentejo, ndërroi jetë në shtëpinë e tij në Portugali të shtunën.
Vdekja e tij u bë e ditur në rrjetet sociale nga një veteriner i cili ka ndjekur shëndetin e Bobit për ditë me rradhë.
“Pavarësisht se mbijetoi çdo qen në histori, 11,478 ditët e tij në tokë nuk do të ishin kurrë të mjaftueshme, për ata që e donin atë”, shkroi Dr Karen Becker.
Bobi u bë qeni më i vjetër në botë duke mposhtur një rekord pothuajse shekullor për titullin e fundit.
Qeni i mëparshëm më i vjetër ndonjëherë ishte Bluey i Australisë, i cili vdiq në vitin 1939 në moshën 29 vjeç e pesë muaj.
Një pjesë e sekretit të jetëgjatësisë së Bobit thuhet se qëndronte në mjedisin paqësor ku ai jetonte. Bobi jetoi gjithë jetën e tij me familjen Costa në fshatin Conqueiros, afër bregut perëndimor të Portugalisë, pasi lindi me tre vëllezër e motra në një ndërtesë shtesë.
Leonel Costa, i cili në atë kohë ishte tetë vjeç, tha se prindërit e tij kishin shumë kafshë dhe nuk mund t’i mbanin të gjithë këlyshët, përveç Bobit.
Costa dhe vëllezërit e tij e mbajtën të fshehtë ekzistencën e qenit nga prindërit e tyre derisa përfundimisht u zbulua dhe u bë pjesë e familjes, e cila e ushqente me të njëjtin ushqim që ata hanë.
Përveç frikës në vitin 2018, kur ai u shtrua në spital pasi u rrëzua papritur për shkak të vështirësisë në frymëmarrje, Costa tha në Shkurt se Bobi kishte shijuar një jetë relativisht pa probleme dhe mendonte se sekreti i jetëgjatësisë së tij ishte “mjedisi i qetë dhe paqësor” që jetonte.
Megjithatë, ai kishte përjetuar probleme në të ecur dhe përkeqësim të shikimit përpara vdekjes së tij.
Bobi nuk ishte i vetmi qen në pronësi të z. Costa që jetoi një jetë të gjatë. Nëna e Bobit jetoi deri në moshën 18-vjeçare, ndërsa një tjetër qen i familjes vdiq në moshën 22-vjeçare./Opinion.al
