Ditën e sotme policia dhe ushtria janë angazhuar që qytetarët të mbajnë radhë të sigurta në hyrje të bankave dhe ushqimoreve.
Këtë masë e ka përshëndetur edhe Presidenti Meta i cili ka ndarë në Facebook, posimin ministres së Mbrojtjes, Olta Xhacka e cila ka njoftuar nismën dhe i ka bërë apel qytetarëve që të zbatojnë masat e sigurisë.
“Mirënjohje të thellë dhe falenderim për çdo efektiv të Forcave të Armatosura dhe Policisë së Shtetit në krye të detyrës! SË BASHKU PËR TË MBROJTUR SHËNDETIN E ÇDO QYTETARI”, shkruan Meta.
Ndërkohë Xhacka më parë kishte shkruar:
Në çdo supermarket dhe bankë në fashat e orareve 6.00 – 10.00 dhe 16.00 – 18.00 do të gjeni efektivë të Forcave të Armatosura dhe të Policisë së Shtetit për të mundësuar të gjithë bashkë, ju dhe ne, zbatimin E PADISKUTUESHËM të rregullave të vendosura për këto ditë të vështira. Këta djem që shikoni në foto kanë lënë në shtëpi familjet e tyre e po bëjnë të pamundurën për t’ju mbrojtur në mënyrën më të mirë që ata dinë: DISIPLINIMIN.
Ndiqni këshillat e specialistëve; Respektoni oraret; Mbani rradhën në supermarkete e banka; Ruani distancën 2 metër nga njëri – tjetri; Respektoni masat mbrojtëse në ambjentet publike; Qëndroni në shtëpi me familjet tuaja.
Mirënjohje çdo efektivi të FA e Policisë së Shtetit në krye të detyrës. /Oponion.al
