Teksa ka kaluar një ditë nga ngjarja e rëndë që u raportua të dielën në Tiranë, ku një 28-vjeçare u mbajt peng për gati 1 javë dhe u dhunua nga bashkëjetuesi i saj, 31-vjeçari Gleard Gusholli kanë dalë detaje të reja. Dy të rinjtë, ishin në një lidhje prej gati 1 viti dhe bashkëjetonin.
Sipas Klan News, 28-vjeçarja ndodhet aktualisht në spital dhe gjendja saj shëndetësore është e mirë. Gjatë 1 jave, si pasojë e dhunës sistematike ajo mësohet se kishte marrë plagë të shumta në trup.
Sakaq, autori i dhunës së të resë, 31-vjeçari Gleard Gusholli dyshohet që të gjitha veprimet i ka kryer gjatë kohës që ndodhej nën efektin e lëndëve narkotike, kjo dhe për shkak të drogës që u gjet në banesën ku u mbajt e dhunua 28-vjeçarja.
Për rastin në pranga përfunduan edhe 4 persona të tjerë. Dy prej të cilëve, Bledi Kateshi dhe Erlind Kateshi, të cilët akuzohen se ndihmuan autorin të largohej nga vendi i ngjarjes. Ndërsa Arjan Sheta dhe Besmir Nurçellari akuzohen për moskallëzim krimi dhe fshehje të provave.
Policia ka mundur po ashtu të zbardhë të gjithë dinamikën e ngjarjes. 28-vjeçarja dhunohej dhe goditej me sende të forta, mes të cilave me këmbën e një karrigeje, që u sekuestrua në policia.
Ka qenë motra e autorit së bashku me një vajzë tjetër që e çuan fillimisht në ambientet e një klinike private në afërsi të komisariatit numër 2, 28-vjeçaren. Më pas kanë qenë mjekët e klinikës që kanë njoftuar policinë.
E teksa motra e autorit çoi të rënë për ndihmë mjekësore, bashkëshorti i saj e ndihmoi të arratisej, duke u bërë kështu bashkëpunëtor në krim.
Deri më tani, dyshohet se shkak për ngjarjen e rëndë u bë xhelozia. Sipas Klan News në deklarimet e para që ka dhënë para hetuesve, 31-vjeçari Gusholli ka thënë se ka dhunar të renë, pasi dyshonte se kjo e fundit e tradhtonte.
