Kosova mban sot zgjedhjet lokale, ndërsa Zëdhënësi i Komisionit Qendror Zgjedhor, Valmir Elezi njoftoi se të gjitha qendrat e votimit janë hapur në orën 07:00 të mëngjesit.
“Ju njoftoj se në orën 07:00 janë hapur të gjitha vendvotimet. Numri i qendrave të votimit ku ka filluar procesi i votimit është 883 me gjithsej 2,477 vendvotime. Sot në Republikën e Kosovës mbahen Zgjedhjet Lokale të shtatat me radhë për Kuvende Komunale dhe të pestat për Kryetarë të Komunave”, tha Elezi.
Numri i qytetarëve me të drejtë vote në këto zgjedhje është 1 milion e 885 mijë e 448 persona.
Zgjedhjet mbahen për të zgjedhur 38 Kryetarët e Komunave dhe 1,002 anëtarët e 38 Kuvendeve Komunale. Numri i përgjithshëm i kandidatëve të certifikuar për pjesëmarrje në këto zgjedhje është 5 mijë e 364 kandidatë, prej të cilëve 166 kandidatë për Kryetar Komune dhe 5 mijë e 198 kandidatë për Kuvende Komunale./Opinion.al
