Mazhoranca ka bllokuar sërish kërkesën e opozitës për interpelancë urgjente me kryeministrin Edi Rama. Pas votimit kundër në Kuvend, opozita ka bllokuar sërish foltoren.
Prej nisjes së seancës plenare sot, deputetët e opozitës kanë kërkuar kryeministrin e vendit në Kuvend që të përballet me ata lidhur me çështjen e Arben Ahmetaj.
Opozita kërkoi fillimisht mbledhjen urgjente të Konferencës së Kryetarëve që të ndryshohej rendi i ditës si dhe praninë e kryeministrit Edi Rama në seancë.
Ish kryeministri Sali Berisha ka kërkuar që të nxirren jashtë rendit të ditës në seancën parlamentare tre ligjet e sjella me urgjencë nga mazhoranca e PS-së, ligjin për Akademinë, ligjin për studentët e mjekësisë dhe ligjin për legalizimin e kanabisit.
Opozita gjithashtu kërkoi pjesëmarrjen në seancë plenare të një grupi përfaqësuesish të studentëve të Mjekësisë, të cilët po protestojnë jashtë godinës kundër projektligjit.
