Ministria e Arsimit ka publikuar rregulloren që duhet të kenë parasysh maturantët që u nënshtrohen provimeve të maturës.
Ndryshe nga vitet e mëparshme këtë vit do të ketë vetëm një formular, ai A1/A1Z, në të cilin përcaktohen lëndët me zgjedhje që do të japë një maturant gjatë muajit qershor.
Rregullorja, në kreun IV të saj, ka caktuar datën 10 mars për miratimin e formularëve, ndërsa pesë ditë më pas nis plotësimi nëpërmjet portalit qeveritar.
“MAS, deri më datë 10 mars 2016, miraton formularët A1 dhe A1Z, si dhe udhëzuesit. Deri më 11 mars 2016, shpallen në portalin e MASit dhe në faqen elektronike të AKP-së formularët A1 dhe A1Z, udhëzuesi i plotësimit online të formularit nga maturanti/kandidati dhe udhëzuesi i plotë simit online të bazës së të dhënave nga Komisioni Shtetëror për Maturën Shtetërore.”
Një maturant regjistrohet për t’u futur në provime dy herë, në portalin qeveritar ealbania në periudhën 15-30 mars dhe më pas në portalin Matura Shtetërore përgjatë periudhës 25 mars deri më 10 prill, sipas një kalendari datash nëpër rrethe që e përcakton Agjencia Kombëtare e Provimeve.
Në rast të gabimeve gjatë regjistrimit që e penalizon në vijimin e garës, maturanti ka një mundësi ta korrigjojë deri më datën 30 prill.
