Pas dorëzimit në polici, Ervin Mata ka dhënë edhe dëshminë përballë autoriteteve. Mësohet se Mata është shprehur se nuk ka marrë pjesë në krim dhe se është arratisur nga frika.
“Nuk kam qëlluar me armë zjarri. Jam larguar pas të shtënave sepse u frikësova, por nuk kam qëlluar. Mua më sulmuan”, ka thënë Mata, i cili ka qenë në arrati për pesë muaj.
Në njoftimin e saj, policia thotë se Ervin Mata është person i dyshuar për veprat penale të vrasjes së mbetur në tentativë, e kryer në bashkëpunim dhe armëmbajtje pa leje.
Hetimet nuk e kanë përcaktuar ende rolin e tij në konfliktin me armë, ku mbeti i vrarë Fabian Gaxha. Njëra nga pistat e hetimit është ajo e një konflikti direkt të tij me Ervis Martinin. Në polici është pyetur edhe e dashura e tij, këngëtarja Elvana Gjata, e cila rrëzoi pistën e sherrit si pasojë e ngacmimit të saj nga Fabian Gaxha.
Pak kohë më parë, policia arrestoi edhe bashkëpunëtorin e Ervin Matës, Fabio Allushin.Tashmë në kërkim është vetëm komandoja 41-vjeçar Melviol Billo, i cili akuzohet se hapi zjarr duke lënë një të vrarë dhe 2 të plagosur./Opinion.al
