Tre persona të maskuar kanë grabitur banesën e një tregtari në fshatin Lumalas të Korçës. Policia tha se ngjarja ka ndodhur në mesnatë, në orën 03:00 të së dielës. Personat e armatosur kanë arritur të hyjnë në banesën e shtetasit I.Sh, 60 vjeç dhe nën presionin e armës kanë marrë dy kasaforta me para.
“Nga hetimet paraprake, dyshohet se autorët kanë hyrë në dhomën e gjumit dhe nën presionin e armës kanë mundur të marrin ne dy kasaforta një shumë parash. Shtetasi I.Sh, ka një aktivitet privat në fushën e tregtisë”, thotë policia.
Në momentin kur ka ndodhur ngjarja, në banesë ndodheshin vetëm çifti i bashkëshortëve. Lidhur me ngjarjen, grupi hetimor po kryen verifikimet përkatëse, po punohet për identifikimin dhe kapjen e autorëve, si edhe zbardhjen e rrethanave të ngjarjes.
