15 urdhër-arreste u firmosën nga Gjykata e Tiranës për 15 persona të cilët mashtronin qytetarët e BE-së përmes Call-Center në Tiranë.
Bazuar në provat e siguruara nga një hetimi tremujor, me metoda speciale, Gjykata e Rrethit Gjyqësor Tiranë, caktoi masën e sigurisë “Arrest në burg“, për 15 shtetas, nga të cilët 9 shtetas italianë dhe 6 shtetas shqiptarë.
Sipas informacioneve, dëmi deri tani rezulton të ketë shkuar deri në 5 milionë euro, teksa në operacionin që është në vijim mësohet se është arrestuar vetëm njëri prej 15 personave që është dhënë masa e sigurisë “Arrest me burg” . Bëhet fjalë për A. L., 30 vjeç.
Si rezultat i verifikimeve të kryera në sistemin TIMS ka rezultuar se 9 shtetasit italianë dhe 1 shtetas shqiptar, nuk ndodhen në Shqipëri.
Vijojnë kontrollet intensive për kapjen e 4 shtetasve të tjerë shqiptarë, ndaj të cilëve është caktuar masa e sigurisë “Arrest në burg”.
Gjithashtu, po bashkëpunohet edhe me homologët italianë, për kapjen e 9 shtetasve italianë dhe të një shtetasi shqiptar, autorë të dyshuar për këtë veprimtari kriminale, ndaj të cilëve është caktuar masa e sigurisë “Arrest në burg”.
Policia me qëllim ruajtjen e konfidencialitetit të hetimit, nuk ka bërë të ditura gjeneralitetet e shtetasve ndaj të cilëve janë caktuar masa sigurie.
