Sekretari i Përgjithshëm i PD, në një dalje për mediat nga selia blu i është përgjigjur reagimit të kryetares së LSI, Monika Kryemadhi, lidhur me deklaratat e tij se i është propozuar LSI 15 mandate të sigurta për të dalë me një listë të përbashkët në 25 prill por LSI ka refuzuar.
Kryemadhi e mohoi këtë fakt madje e cilësoi si mashtrim pervers ndërsa Bardhi vijon ti qëndrojë deklaratës së tij dhe thotë se nuk ka deformuar asgjë, por vetëm ka ripërsëritur atë që ka artikuluar sistematikisht Kryemadhi, në lidhje me mandatet e fituara.
Bardhi theksoi se me ndryshimet në Kodin Zgjedhor, LSI ishte e bindur se do të merrte 40 mandate deputetësh, ndaj dhe vendosi të dalë me listë më vete në zgjedhje.
“Nuk është mbledhur sepse nuk ka pasur dakordësi nga kryetarja e LSI, për të propozuar hyrjen në një listë të përbashkët. Qëndrimi i LSI ka qenë për të dalë me dy lista të veçanta, pavarësisht se ne donim të futeshim në një listë, por vlerësimi i LSI ishte se ata do të maksimalizonin votën duke hyrë në dy lista të veçanta. Kryemadhi ka thënë se me ndryshimet e njëanshme të bëra nga Rama në Kodin Zgjedhor, LSI do të merrte 40 mandate. Ai veprim i pa precedent i Edi Ramës ishte dhunim dhe një nga shkaqet që nuk u përkthye në mandate i gjithë vullneti i popullit opozitar. Ju e dini që LSI nuk ka zhvilluar fushatë në Qarkun e Elbasanit. PD ka pasur vullnetin për të hyrë në një listë të përbashkët me LSI dhe qëndrimit koherent të LSI për të hyrë me dy lista të veçanta. Kjo deklaratë e imja ka përbërë publik ka shqetësuar LSI, por këto janë fakte publike”, u shpreh Gazment Bardhi./Opinion.al
