Komisionarja e Lartë e Kombeve të Bashkuara për të Drejtat e Njeriut, Michelle Bachelet, iu bëri thirrje vendeve që të përmbahen nga shkelja e të drejtave të njeriut, teksa marrin masa të jashtëzakonshme për të luftuar pandeminë e koronavirusit.
Bachelet pranoi se shtetet kanë të drejtë të kufizojnë disa të drejta për të mbrojtur shëndetin publik, por këmbënguli që çdo kufizim duhet të jetë i nevojshëm, proporcional dhe jo-diskriminues, dhe gjithashtu i kufizuar në kohëzgjatje.
“Vendet po minojnë sundimin e ligjit në emër të luftimit të pandemisë së koronavirusit duke shkaktuar një fatkeqësi për të drejtat e njeriut. Masat urgjente nuk duhet të jenë një armë që qeveritë mund ta përdorin për të minuar kundërshtimin, pastaj për të kontrolluar popullin dhe madje edhe të zgjasin kohën e tyre në pushtet”, u shpreh Bachelet.
Komentet e saj erdhën pasi më shumë se 200,000 njerëz kanë humbur jetën dhe gati tre milionë janë infektuar nga koronavirusi, i cili u shfaq në Kinë në fund të vitit të kaluar./Opinion.al
