Kryeministri i Kosovës Albin Kurti ka reaguar, ditën e sotme, në lidhje me deklaratat e zyrtarëve të Bashkimit Evropian, të cilët i kanë quajtur spekulime lajmet që po qarkullojnë se do të hiqen masat e vendosura për Kosovën.
Kurti i pyetur nga gazetarët nëse beson se BE-ja do t’ia heqë Kosovës masat, u përgjigj shkurtimisht:
“Nuk mendoj se duhet të spekuloj për spekulimet”, tha kryeministri Kurti.
Zyrtarë të Bashkimit Evropian kanë deklaruar se heqja e masave ndëshkuese ndaj Kosovës është çështje institucionale e vendeve anëtare dhe jo e dikujt nga jashtë që të përpiqet të spekulojë për përmbajtjen dhe afatet kohore.
“Do të bëhet në kohën që është e duhur për Përfaqësuesin e Lartë dhe shtetet anëtare dhe përmbajtjen do ta shohin dhe diskutojnë fillimisht shtetet anëtare dhe më pas të marrin vendimet e nevojshme. Dhe kur kjo të ketë ndodhur ose kur kjo do të ndodhë, do t’i njoftojmë kolegët tanë në Kosovë se cili është rezultati. Pra nuk ka hapësirë dhe nuk shohim arsye për këto spekulime publike dhe njoftime nga aktorë të ndryshëm”, tha gjatë një konference të hënën, zëdhënësi i BE-së, Peter Stano.
