Vijojnë kontrollet e autoriteteve për respektimin e masave anti-COVID. Policia e Shtetit njofton se janë ndëshkuar me gjobë 1357 qytetarë që nuk kanë zbatuar masat e vendosua nga qeveria për të frenuar përhapjen e pandemisë së koronavirusit.
Autoritetet bëjnë me dije se si rezultat i kontrolleve, gjatë 4 ditëve të fundit, në të gjithë vendin, janë ndëshkuar me gjobë 3.000 lekë, 1332 qytetarë që janë konstatuar duke lëvizur pa maskat mbrojtëse.
Po ashtu, janë shoqëruar në ambientet e Policisë në të gjithë vendin, 18 shtetas që nuk kanë pranuar t’i tregojnë punonjësve të Policisë dokumentin e identifikimit. Pasi janë identifikuar ata janë ndëshkuar me masën administrative 3.000 lekë dhe më pas janë lënë të lirë.
Gjatë kontrolleve të ushtruara në subjekte, efektivët e Policisë kanë evidentuar 5 lokale në të cilët ushtrohej aktiviteti në kundërshtim me protokollet e sigurisë anti-COVID. Për secilin nga subjektet autoritetet vendosën gjobë prej 1.000.000 lekë.
Ndërsa, janë konstatuar 20 qytetarë që lëviznin në rrugë pas orës 20:30, pa arsye të domosdoshme, të cilët janë ndëshkuar me gjobë 10.000 lekë secili./ Opinion.al
