Vijojnë kontrollet e autoriteteve për respektimin e masave anti-COVID. Policia e Shtetit bën me dije se gjatë 48 orëve të fundit, në të gjithë vendin, janë ndëshkuar me gjobë 1270 qytetarë të cilët nuk kanë respektuar masat e marra nga Komiteti i Ekspertëve me qëllim frenimin e pandemisë.
Autoritetet bëjnë me dije se gjatë kontrolleve në fundjavë, në të gjithë vendin, efektivët e policisë kanë gjobitur me 3.000 lekë secili, 1257 qytetarë që janë konstatuar duke lëvizur pa maskat mbrojtëse.
Po ashtu janë shoqëruar në ambientet e Policisë në të gjithë vendin, 15 shtetas që nuk kanë pranuar t’i tregojnë punonjësve të Policisë dokumentin e identifikimit. Pasi janë identifikuar ata janë ndëshkuar me gjobë dhe më pas janë lënë të lirë.
Ndërsa, gjatë kontrolleve të ushtruara në subjekte të ndryshme, shërbimet e Policisë kanë evidentuar 5 subjekte që ushtronin aktivitetin në kundërshtim me protokollet e sigurisë. Për administratorin e secilit subjekt është vendosur masa administrative 1.000.000 lekë.
Gjithashtu, gjatë kontrolleve në fundjavë janë konstatuar 8 qytetarë që lëviznin në rrugë gjatë orarit të ndaluar të lëvizjes, pa arsye të domosdoshme, të cilët janë ndëshkuar me masën administrative 10.000 lekë secili./Opinion.al
