Masat anti-COVID/ Gjobiten 2673 qytetarë, pezullohen 63 leje drejtimi

Policia e Shtetit vijon kontrollet për respektimin e masave anti-COVID. Përmes një njoftimi bëhet me dije se gjatë fundjavës janë ndëshkuar me gjobë 2673 shtetas që nuk kanë zbatuar masat për parandalimin e përhapjes së COVID-19, 2594 prej tyre për mosvendosjen e maskës mbrojtëse.

Gjithashtu, efektivët e policisë kanë ndëshkuar me gjobë 331 shtetas që udhëtonin në mjete private me persona me të cilët nuk kishin lidhje familjare apo në mjetet e transportit publik, pa vendosur maskat mbrojtëse, si dhe kanë ndëshkuar me pezullim të lejes së drejtimit dhe bllokim mjeti, 63 drejtues mjetesh që qarkullonin pa autorizimin përkatës pas orës 20:00.

Gjatë kontrolleve janë shoqëruar në ambientet e komisariateve 17 shtetas që nuk kanë pranuar t’i tregojnë punonjësve të Policisë dokumentin e identifikimit. Pasi janë identifikuar ata janë ndëshkuar me gjobë 3.000 lekë dhe janë lënë të lirë.

Ndërsa janë gjobitur me 1.000.000 lekë, 6 administratorë subjektesh që janë konstatuar duke ushtruar aktivitetin në kundërshtim me protokollet e sigurisë anti-COVID.

Në të gjithë vendin janë gjobitur 10.000 lekë, 73 shtetas që janë konstatuar duke lëvizur në këmbë pas orës 20:00, pa ndonjë arsye të domosdoshme.