Pas ngjarjeve tragjike që mbuluan Serbinë, Ministria e Punëve të Brendshme të Serbisë u bëri thirrje të gjithë personave që posedojnë armë të paregjistruara që në periudhën nga 8 maji deri më 8 qershor t’ia dorëzojnë ato autoriteteve.
Në vetëm një ditë, 1500 armë, 50 mijë fishekë dhe mbi 100 bomba iu dorëzuan komisariateve.
Zheljko Brkiç, sekretar në Ministrinë e Brendshme u bëri thirrje qytetarëve që të dorëzojnë çdo lloj arme dhe të mos i hedhin apo t’i lënë në hapësira publike.
Qytetarët mund të dorëzojnë armët në posedim pa leje në të gjitha komisariatet nga ora 07:00 deri në orën 19:00. Gjatë dorëzimit, atyre nuk u kërkohet të tregojnë identitetin. Presidenti i Serbisë Aleksandër Vuçiç paralajmëroi vendosjen e masave edhe më të rrepta për zvogëlimin e sasisë së armëve legale.
“Ne do të ndryshojmë Kodin Penal duke rritur dënimet për mbajtjen e armëve”, tha Vuçiç.
Ligji i Armëve parashikon që ato duhet të mbahen në kasaforta, të mbyllura ose me kod, veçmas nga municionet. Ndërsa një person për të zotëruar një armë duhet të plotësojë kushtet shëndetësore, të cilat do të kontrollohen çdo gjashtë muaj deri në një vit.
Kujtojmë se, përveç mundësisë së sjelljes së tyre personalisht, qytetarët mund të dorëzojnë armë të paregjistruara, municione dhe mjete shpërthyese pa dalë nga shtëpia, duke telefonuar në komisariatin më të afërt, i cili do të dërgojë një patrullë në adresën e dhënë dhe do të mbledhë armët.
Shtetasit që dorëzojnë armët e paregjistruara nuk do të kenë përgjegjësi penale dhe as pasoja dhe nuk duhet të dëshmojnë origjinën e armëve./Opinion.al
