Autori i dyshuar i masakrës në dy xhami në Zelandën e Re ku mbetën të vrarë 49 persona ka dalë përpara gjykatës. Australiani 28 vjeçar Brenton Tarrant u shfaq përpara trupit gjykues i veshur me një bluzë të bardhë dhe i prangosur.
Sipas gjykatës ende nuk janë formuluar të gjitha akuzat kundrejt tij, ndërkohë që e vetmja akuzë mbi të është ajo e vrasjes.
Gjithashtu janë ndalur edhe dy persona të tjerë që mendohen si të përfshirë në këtë ngjarje, të cilët nuk ka asnjë dosje penale dhe gjenden në paraburgim. Kryeministrja e Zelandës së Re e ka quajtur 28-vjeçarin një terrorist ekstremist dhe të dhunshëm. Gjithashtu ajo shtoi se Tarrant kishte leje për përdorimin e armëve dhe për këtë arsye duhet rishikuar ky ligj dhe ndryshuar.
I dyshuari për sulmin terrorist Tarrant ka qëndruar i heshtur gjatë seancës gjyqësore, ndërkohë që do të mbahet në burg deri në datën 5 prill, kur do të dalë sërish përpara trupit gjykues. Sulmi i tij është cilësuar si terrorist, ndërkohë që ende po bëhet identifikimi i të gjithë viktimave.
Armët e përdorura për këtë sulm janë modifikuar nga Tarrant, ndërkohë që makina e tij ishte e mbushur me armë të tjera çka nënkupton se qëllimi i tij ishte të vijonte edhe më tej me sulmin. Shumë njerëz janë mbledhur gjatë ditës së sotme jashtë dy xhamive në shenjë proteste me pankarta “Kjo nuk është Zelanda e Re”.
Ndërkohë qëllimet e Brenton Tarrant ishin të qarta, ai ishte duke e përgatitur këtë sulm prej muajsh, por sërish nuk ishte në ndonjë listë të policisë për verifikim./Xh.K/Opinion.al/
