Të tjera detaje mësohen nga ngjarja e rëndë e Shkodrës, ku dy persona u vranë dhe 4 të tjerë u plagosën pas një sherri banal për një lojë bixhozi në lokalin e fshatit Dajç.
Autori Miklovan Parubi, një përdorues droge, kishte pasur konflikt me Ndok Markun, 35 vjeç i cili mbeti i plagosur në këtë ngjarje.
Ndërsa 42-vjeçari Arjet Saiti, pronari i lokalit, i cili humbi jetën kishte tentuar t’i marrë armën autorit.
Në gjendje të rënduar psikologjike, Miklovan Parubi ka qëlluar me breshëri automatik në lokal dhe ka bërtitur: “Do ju vras të gjithëve!”. Dyshohet se viktima tjetër, Gacalin Kopshti 30 vjeç nuk ka patur lidhje me autorin, por ka mbetur i vrarë aksidentalisht.
Katër të plagosurit janë: Ndok Marku, Vinçens Kopshti, Aleks Prendi dhe Kitas Molla.
Forca të shumta policie dhe ato të FNSH-së janë vënë në kërkim të autorit i cili është i armatosur. Policia ka vënë në dispozicion edhe një shpërblim prej 500.000 lekësh të reja ose 5 milionë të vjetra për çdo informacion për vendndodhjen e autorit.
“Drejtoria Vendore e Policisë Shkodër njofton se ofron një shpërblim prej 500.000 lekë, për çdo informacion që çon në saktësimin e vendndodhjes së autorit të ngjarjes duke siguruar anonimatin. Për çdo të dhënë mund të kontaktoni në çdo kohë në numrat e telefonit 069 41 01 985 dhe 069 41 02 060, por dhe në numrin 129”, njofton Policia.
Kërkimet janë shtrirë në zonën e Nënshkodrës me qëllim kapjen dhe vënien para drejtësisë së autorit të ngjarjes.
