Gjykata e Shkodrës ka dhënë sot masën e sigurisë për dy personat që mbetën të plagosur në masakrën e Velipojës, ku pas një konflikti me armë zjarri për hapësirat bregdetare mbetën të vdekur katër persona.
Mësohet se togat e zeza kanë caktuar masën e sigurimit personal “arrest në burg” pa afat për Hasan Ferracakun dhe Elmilind Dylin, dy të plagosurit, të cilët u arrestuan si të përfshirë në ngjarje.
Seanca është mbajtur në Spitalin e Traumës në Tiranë për shkak të gjendjes së vështirë shëndetësore të të plagosurve. Burime bëjnë me dije se prokuroria kërkoi për të 2 personat arrest në burg, ndërsa pala mbrojtëse kërkoi masë më të butë për 17-vjeçarin Elmilind Dyli, për shkak të moshës, por nuk u pranua nga gjykata. Të dy të plagosurit gjatë sencës nuk kanë dhënë deklarime.
