Pretendimi i ish-prokurorit, Skënder Demiraj, babait të një prej viktimave të masakrës së Kostandin Xhuvanit, në nëntor 2014, në Tiranë, se djalit të tij nuk iu dha ndihma mjekësore, kundërshtohet nga pesë dëshmitarë në vendin e ngjarjes.
Në një kohë që Prokuroria do të vazhdojë hetimet për kallëzimin e Demirajt për mosdhënie ndihme nga ana e Policisë, duket se prova kryesore në favor të tij është një kamera sigurie që ka filmuar gjithë situatën.
“Panorama” zbardh sot deklarimin e dhënë nga një oficer i Policisë Gjyqësore, i pranishëm në vendngjarje pak pasi Xhuvani vrau katër veta pranë një lokali nate në Rrugën e Elbasanit.
Sipas deklaruesit F. Dumi, kallëzuesi Skënder Demiraj ka qëndruar pranë grupit hetimor gjatë kryerjes së veprimeve të para dhe në asnjë moment ai nuk është penguar prej tyre.
Po sipas oficerit Dumi, Demiraj në asnjë moment nuk ka shfaqur ndonjë kërkesë apo pretendim lidhur me trupin e djalit të tij.
Dëshmia e Dumit zbardhet në vendimin e Gjykatës që urdhëroi Prokurorinë të vazhdonte hetimin e kallëzimit të Demirajt.
DËSHMIA
Specialisti i hetimit në DPQ Tiranë, O.P.Gj. F. Dumi në deklarimin e tij sqaron se në datë 04.11.2014, në orët e para të mëngjesit, pas njoftimit të marrë, ka shkuar në vendin e ngjarjes ku ka gjetur shumë forca policie.
Në rrugë, pikërisht përballë lokalit “Ante Grand”, ka parë një mjet tip fuoristradë, me targa TRxxx N.
Dera e pasme e tij nga ana e shoferit ishte e hapur, tapiceria e derës ishte e dalë nga vendi, ndërsa në sediljen e pasme ndodhej një person i seksit mashkull, pa shenja jete, i shtrirë në pozicion me kurriz.
Pasi i është afruar bashkë me ekspertët, kanë konstatuar në pjesën e gjoksit se personi kishte një vrimë dhe një njollë me ngjyrë të kuqe si ajo e gjakut. Bashkë me ekspertët kanë bërë këqyrjen e vendit të ngjarjes, duke filluar me këqyrjen e automjetit në fjalë së bashku me viktimën e gjetur në këtë mjet.
Pranë tyre është afruar një person, i cili i tha se ishte babai i viktimës. Ai quhej Skënder Demiraj dhe viktima quhej Arbër Demiraj.
Pranë mjetit në fjalë aty pranë ishte një autoambulancë dhe në momentin që kanë bërë këqyrjen dhe përshkrimin e kufomës së shtetasit Arbër Demiraj, ka qenë prezent dhe prokurori.
Që nga momenti i fillimit të këqyrjes së kufomës së Arbër Demirajt, shtetasi Skënder Demiraj ka qenë pranë grupit hetimor dhe në asnjë moment nuk është penguar nga ana e tyre.
Në momentin që Festimi ka mbërritur në vendin e ngjarjes, shtetasin Skënder Demiraj e ka gjetur aty. Gjatë gjithë kohës ai nuk ka shfaqur asnjë kërkesë apo pretendim lidhur me kufomën e djalit e tij.
Pasi është bërë përshkrimi i viktimës, ai është transportuar me autoambulancë për në ambientet e Institutit të Mjekësisë Ligjore Tiranë, ndërsa F. Dumi ka vazhduar me këqyrjen e automjetit.
Aty është konstatuar se në kuadër ishte çelësi dhe në sediljen e pasme kishte një njollë të kuqe si ajo e gjakut. Më pas këqyrja e vendit të ngjarjes ka vazhduar në ambientet e brendshme të lokalit “Ante Grand”, ku janë gjetur dy kufoma të tjera të identifikuara si shtetasit Enea
Xhaji dhe Edison Jaho.
Kufoma e parë që është transportuar për në morg ka qenë ajo e shtetasit Arbër Demiraj dhe më pas janë transportuar dy kufomat e shtetasve Enea Xhaji dhe Edison Jaho, ndërsa shtetasi italian ishte transportuar më parë për në spital.
Pasi kishte vdekur, edhe kufoma e shtetasit italian është dërguar për ekzaminim në IML Tiranë. Në deklarimin e tij F. Dumi sqaron gjithashtu se kur ka mbërritur në vendngjarje, ka konstatuar shtetasin Arbër Demiraj pa asnjë shenjë jete./ Panorama.al Armand Bajrami
