Nëna e 30 vjeçarit, Gacalin Kopshti ka qenë ndër të parët që ka shkuar në lokalin ku u vra i biri dhe një person tjetër mbrëmë në Dajç. Gruaja që shihni në foto, citohet nga Report tv, të ketë thënë: “Ma vranë djalin me bukë në gojë”.
Ndërsa xhaxhai i tij në një prononcim për mediat tha se Gacalini kishte qenë për peshkim dhe kishte kaluar me motorin e tij nga lokali për ti sjellë një vegël pronarit të lokalit.
“Ku ku për ne! Nuk di gjë çfarë është bërë për ne. Ka qenë duke gjujt peshk, ka ardh me e pru një vegël për me e ndez këtu. Motorrin e ka aty i vdekuri. Gacalini e ka motorrin aty”.
Ndërkohë i plagosur ka mbetur dhe vëllai i viktimës Gacalin Kopshti, Vinçens Kopshti 22 vjeç. I pyetur nëse Gacalini ka pasur ndonjë konflikt, xhaxhai tij thotë se s’ka dijeni.
“Nuk di gjë. Nuk kam haber.Një nip tjetër i imi është i plagosur dhe një tjetër i pronarit të lokalit. Ky ka ardh me i pru një vegël këtij Sejdinit”, u shpreh ai.
*xhaxhai i viktimes
Shtëpitë e viktimave kanë qenë afër me lokalin ku ndodhi masakra e mbrëmshme dhe kanë mbërritur në vendin e ngjarjes në minutat e para.
Nga dëshmitë e para mësohet se Gacalin Kopshti është vrarë aksidentalisht, pasi nuk ishte në tavolinë me autorin dhe personat e tjerë.
Viktima tjetër është Arjet Saiti 42 vjeç, banues në Dajç të Shkodrës.
Ndërsa të plagosur kanë mbetur Ndok Marku, Vinçens Kopshti, Aleks Prendi dhe Kitas Molla. Paraprakisht thuhet se autori, një perdorues droge, Miklovan Parubi, ka bërë sherr në lokal pasi ka humbur në lojë bixhozi. Ai është larguar nga lokali dhe më pas është kthyer me automatik duke qëlluar me breshëri plumbash.
Policia është në kërkim të tij.
*Nena e viktimes
