Prokuroria e Tiranës ka përfunduar hetimin ndaj Nikoll Sherrnikut, i dyshuar si i përfshirë në sulmin e armatosur ndaj lokalit të Fatjon Muratit në “Don Bosko”, ku u vra banakierja Mimoza Paja dhe u plagosën 5 vetë të tjerë.
Sipas informacioneve, prokuroria i ka komunikuar Sherrnikut akuzën për “krijim kushtesh për të kryer vrasje”.
Sherrniku akuzohet se ka vjedhur targat ne Gjermani dhe makinën e autorëve që kryen vrasjen në Don Bosko ne 12 mars te këtij viti.
Nikoll Sherrniku, dyshohet si i përfshirë në grupin e Ervis Martinajt edhe gjithashtu ishte shok i Brilant Martinajt, i cili mbeti i vrarë në mbikalimin e Fushë Krujës.
Hetimi ka zbuluar se i dyshuari Sherrniku, ka qenë në masën e “arrestit në shtëpi” për një çështje tjetër penale, kur ka udhëtuar drejt Gjermanisë. Gjatë hetimit Prokuroria e Tiranës ka siguruar dëshminë e një shtetasi kosovar, pronar i një servisi në Gjermani, që tregon se Sherrniku i ka marrë tre targa.
I njëjti fakt është provuar edhe nga deklarimet e një shtetasi tjetër kosovar. Më pas, një person nga Fushë Kuqja, lidhje miqësore e Sherrnikut, ka deklaruar para prokurorëve se targat në Gjermani i kishte marrë me porosi të Ervis Martinajt, pasi i nevojiteshin për t’iu shmangur policies.
Vetë Sherrniku ka pretenduar se nuk ka asnjë lidhje me atentatin në “Don Bosko”, pasi në atë kohë ka qenë në qeli.
