Autoritetet e Seulit kanë arrestuar dy peshkatarë të rinj nga Korea e Veriut. Ata akuzohen se kanë vrarë kapitenin si dhe 15 pjesëtarë të ekuipazhit të një peshkarexhe.
Sipas dy të arrestuarve rreth 20-vjeçarë konflikti ka shpërthyer nga poshtërimet dhe dhuna e ushtruar ndaj tyre nga kapiteni. Pasi hodhën në det trupat e ekuipazhit, të rinjtë bashkë me një bashkëpunëtor iu drejtuan brigjeve të Koresë së Jugut, në portin e Kimchaek.
Aty bashkëpunëtori i tyre u arrestua, ndërsa dyshja mendoi t’i shpëtojë autoriteteve duke rifilluar arratisjen por pa një destinacion të qartë.
Anija e vogël që përpunonte sepje u kap pas dy ditësh nga flota detare e jugut, dhe pas rrëfimit të masakrës së kryer, Autoritetet e Koresë së Jugut morën një vendim të paprecedentë, duke riatdhesuar në Veri dy kriminelët.
Një vendim i paprecedentë ky nga viti 1953, pasi zakonisht shtetasit e Veriut mbahen me statusin e refugjatit politik. Por për rastin në fjalë, sipas autoriteteve të Seulit nuk ekzistonte asnjë kusht që mund të përmbushte statusin e refugjatit, dhe dy personat ishin thjesht “kriminelë të rrezikshëm, dy peshkatarë vrasës”. Ata do të rikthehen në Korenë e Veriut, ku nuk përjashtohet ekzekutimi tyre./Opinion.al
